| |
Y nôl
Datganiad i'r Wasg, 27/06/07
Mae Teledu Omni, y cwmni adnoddau o Gaerdydd, wedi ennill dau gytundeb mawr gan BBC Wales. Mae Omni yn is-gwmni i Grŵp Barcud Derwen, y cwmni adnoddau teledu a ffilm mwyaf y tu allan i Lundain yn y Deyrnas Unedig.
Y cytundeb cyntaf yw i ddarparu gwasanaethau Darlledu Allanol i raglenni a digwyddiadau cyffredinol BBC Cymru. Mae hyn yn cynnwys yr Eisteddfod Genedlaethol a Gŵyl y Faenol Bryn Terfel. BBC Cymru hefyd sydd yn gyfrifol am rai o'r digwyddiadau rhwydwaith mawr fel Cystadleuaeth Piano Leeds a Glyndebourne yn ogystal â Chystadleuaeth Canwr y Byd Caerdydd a gynhaliwyd yn Neuadd Dewi Sant yn gynharach y mis hwn a bydd Omni yn darparu adnoddau ar gyfer y digwyddiadau hyn am y tair blynedd nesaf.
Mae'r ail gytundeb ar gyfer yr holl rygbi cartref yng Nghymru am y tair blynedd nesaf. Mae BBC Cymru yn cynhyrchu Scrum V ar nos Wener yn ogystal â Clwb Rygbi ar gyfer S4C ar ddydd Sadwrn. Bydd Omni yn gweithio yn agos gydag adran Gweithrediadau BBC Cymru gan gyflogi cymysgedd o staff BBC Cymru, gweithwyr llawrydd a phersonél o Grŵp Barcud Derwen er mwyn cyflawni'r cytundeb.
Mae ennill y ddau tendr gyda'u gilydd yn cynrychioli'r cytundeb adnoddau teledu mwyaf a ddyfarnwyd erioed yng Nghymru.
Ar hyn o bryd mae Omni yn adeiladu Uned Ddarlledu Allanol Diffiniad Uchel gwerth £3.7 miliwn, y cyntaf o'i bath yng Nghymru, ac fe'i defnyddir yn helaeth ar gyfer y rhaglenni hyn ochr yn ochr â fflyd y grŵp o dryciau Darlledu Allanol.
Ffurfiwyd Barcud Derwen pan unwyd Barcud a Derwen ddeng mlynedd yn ôl. Sefydlwyd Barcud yn wreiddiol ar gyfer gwasanaethu'r rhaglenni oedd yn cael eu gwneud gan y sector annibynnol yng Nghymru oedd yn gweithio i S4C ac mae'n dathlu ei ben-blwydd yn 25ain eleni. Bellach mae 15 cwmni yn y grŵp yn y Deyrnas Unedig ac Iwerddon. Barcud Derwen sydd yn gyfrifol am y darlledu o Gynulliad Cenedlaethol Cymru ac mewn menter ar y cyd gyda Parthenon Entertainment mae'n dosbarthu rhaglenni S4C ledled y byd. Omni yw menter diweddaraf y grŵp ac fe'i sefydlwyd y llynedd; mae wedi ei leoli yng Nghroes Cwrlwys yng Nghaerdydd lle y mae'n rhedeg y stiwdio 7500 troedfedd sgwâr o fewn adeilad ITV Cymru, yn ogystal â darparu cyfleusterau Darlledu Allanol.
Pennaeth Omni yw Tony Cahalane sydd yn arolygu'r gwaith o adeiladu'r cerbyd Darlledu Allanol newydd. Dywedodd 'Mae'r tryc yn cael ei adeiladu gyda golwg ar waith fel hyn. Mae'n ddelfrydol ar gyfer digwyddiadau mawr, cerddoriaeth a chwaraeon. Rydym eisoes yn cynllunio ail dryc i'w ychwanegu at yr un fydd gennym ar y ffordd cyn hir. Rwyf yn edrych ymlaen at ehangu ar berthynas sydd eisoes yn llwyddiannus gan weithio gyda staff cynhyrchu a gweithrediadau'r BBC.'
Dywedodd Bryn Roberts, Rheolwr Gyfarwyddwri Grŵp Barcud Derwen, wrth dalu teyrnged i waith Tony Cahalane ar baratoi'r cyflwyniad lle yr enillwyd y cytundebau. 'Ers ymuno â'r cwmni mae Tony wedi gweithio'n galed i sicrhau bod y cwmni yn barod ar gyfer y gwaith pan hysbysebwyd y tendrau hyn. Bydd yn wych o beth i ni weithio ar raglenni o safon mor uchel gyda'n Darlledu Allanol Diffiniad Uchel o'r radd flaenaf.'
Dywedodd David Mackie, Pennaeth Cynhyrchu BBC Cymru, 'Cynigion Omni am y ddau gytundeb oedd y gwerth gorau am arian a enillwyd wedi proses gwobrwyo trylwyr. Edrychwn ymlaen i gyd-weithio yn llwyddianus gyda'n gilydd'.
Bydd y cytundebau yn dechrau gyda darllediad BBC Cymru o'r Eisteddfod Genedlaethol yn yr Wyddgrug eleni.
Cysylltiad:
Y nôl
|
|
